ଜୀବନ କଣ??
ଜୀବନ କଣ ବୋଲି ଏକ ପ୍ରଶ୍ନର ଉତ୍ତରରେ ଗୁରୁ ୟୁଜିକେ କହିଥିଲେ ଏହି ଗଳ୍ପଟି।
ରାଜା ବିର ବିକ୍ରମାଦିତ୍ୟଙ୍କ ଦରବାରକୁ ଆସିଲେ ଜଣେ ସନ୍ୟାସୀ। ସେ ରାଜାଙ୍କୁ ଏକ ଜଙ୍ଗଲୀ ଫଳ ଅର୍ପଣ କରି ଚାଲିଗଲେ। ଏଭଳି ଏକ ଜଙ୍ଗଲ ଫଳରେ ରାଜାଙ୍କ କୌଣସି ଆଗ୍ରହ ନଥିଲା। ସୁତରାଂ, ସେ ଫଳଟିକୁ ନିକଟରେ ବସିଥିବା ଜଣେ ଅମତ୍ୟଙ୍କୁ ଦେଇଦେଲେ। ଅମତ୍ୟଙ୍କର ମଧ୍ୟ ଏଭଳି ସାଧାରଣ ଜଙ୍ଗଲୀ ଫଳ ପ୍ରତି କୌଣସି ଆଗ୍ରହ ନଥିଲା। ତେବେ ରାଜା କାଳେ ଖରାପ ଭାବିବେ ସେହି କାରଣରୁ ଟିକେ ଦୂରକୁ ଯାଇ ଗୋଟିଏ କୂଅ ଭିତରକୁ ସେ ତାକୁ ନିକ୍ଷେପ କରିଦେଲେ। ସନ୍ୟାସୀ କିନ୍ତୁ ଏବେ ପ୍ରତିଦିନ ଆସିବାକୁ ଲାଗିଲେ ଏବଂ ପ୍ରତିଦିନ ଗୋଟିଏ ଲେଖାଏଁ ଫଳ ଦେଲେ। କିନ୍ତୁ ଫଳର ଯାତ୍ରା ସବୁଦିନ ଭଳି କୂଅରେ ସରିଲା।
ଏମିତି ଅନେକ ଦିନ ଚାଲିଲା। ଦିନେ ଅମାତ୍ୟ ନଥିବାରୁ ରାଜା ସେହି ଫଳଟି ତାଙ୍କର ପୋଶା ମାଙ୍କଡ଼ଟିକୁ ଦେଇଦେଲେ। ମାଙ୍କଡଟି ଫଳକୁ ଖାଇବା କ୍ଷଣି ସେଥିରୁ ଗଲାଇପଡ଼ିଲା ଏକ ଅତି ମୂଲ୍ୟବାନ ହୀରା। ରାଜା ଚମକି ପଡିଲେ। ଏବେ ସେ ଅମାତ୍ୟଙ୍କୁ ଡକାଇ ଫଳ ବାବଦରେ ପଚାରିଲେ। ଅମାତ୍ୟଙ୍କୁ ନେଇ କୂଅ ନିକଟକୁ ଗଲେ। ଏବେ ସେଠାରେ ମିଳିଲା ଅଗଣିତ ହୀରାର ସନ୍ଧାନ।
ଏହାପରେ କାହାଣୀ ଆହୁରି ରହିଛି।କିନ୍ତୁ ତାକୁ ଏଠାରେ ସାରି ଗୁରୁ କହିଲେ- ଜୀବନ ହେଉଛି ସେଇ ଜଙ୍ଗଲୀ ଫଳ ଯାହା ତୁମ ପାଖରେ ପ୍ରତିଦିନ ସକାଳେ ପହଞ୍ଚେ। ଯାହାକୁ ତୁମେ ହତାଦର କର ବୋଲି ତା ଭିତରେ ଥିବା ହୀରାକୁ ଆବିଷ୍କାର କରି ପାରନାହିଁ। ଯିଏ ତାକୁ ଦୈବାତ ଆବିଷ୍କାର କରିପାରେ ତା ଲାଗି ଜୀବନର ଅର୍ଥ ସମ୍ପୂର୍ଣ୍ଣ ବଦଳିଯାଏ।
