ବର୍ଷା ଅଭାବ ଯୋଗୁଁ ତଳି ନଷ୍ଟ ଚିନ୍ତାରେ ଚାଷୀ
ଖୋର୍ଦ୍ଧା, ତା୨୭/୬- ବର୍ତ୍ତମାନ ଖରିଫ ଋତୁ ଆରମ୍ଭ ହୋଇଥିବାରୁ ଚାଷୀ ନିଜର ଜମିରେ ଧାନ ଚାଷ କରିବା ସହ ତଳି ପକାଇବା କାମରେ ବ୍ୟସ୍ତ ରହୁଅଛି । କିନ୍ତୁ ମୌସୁମୀ ବର୍ଷା ଆଗମନରେ ଚାଷୀ ନିଜର କାର୍ଯ୍ୟ ଗୁଡିକ ଶେଷ କରିବା ପାଇଁ ପ୍ରସ୍ତୁତ ହେଉଥିବା ବେଳେ ବର୍ଷାର ପରିମାଣ କମ ହେତୁ ଆଉ କାର୍ଯ୍ୟ ଆଗକୁ ନଯାଇ ଧିମା ଅବସ୍ଥାରେ ରହିଛି ।
ବେଗୁନିଆ ବ୍ଲକର ୨୧ଗୋଟି ପଞ୍ଚାୟତରେ ମୋଟ ୧୪,୦୯୨ହେକ୍ଟର ଧାନ ଜମି ରହିଛି । ବର୍ତ୍ତମାନ ସୁଦ୍ଧା ୫,୫୭୬ ହେକ୍ଟର ଚାଷଜମିରେ ଧାନ ବୁଣା କାର୍ଯ୍ୟକ୍ରମ ଶେଷ ହୋଇଯାଇଥିବା ସମୟରେ ୫୧୫ ହେକ୍ଟର ଜମିରେ ତଳି ପକାଯାଇଛି ।ଅବଶିଷ୍ଟ ଜମିରେ ଜୁଲାଇ ମାସ ୧୫ ତାରିଖ ସୁଦ୍ଧା ତଳି ପକାଇବା ପାଇଁ ସମୟ ରହିଥିବାରୁ ପାଣିର ଆଵଶ୍ୟକତା ଦୃଷ୍ଟିରୁ ଜୁନ ସୁଦ୍ଧା ୧୯୦ ମିଲିମିଟର ବର୍ଷା ହୋଇଛି । ଏହି ବର୍ଷାର ପରିମାଣ ଆଵଶ୍ୟକତା ଠାରୁ ଅଧିକ ହୋଇଥିଲେ ମଧ୍ୟ ଏବେ ୧୦ ଦିନ ହେବ ଖରାର ପ୍ରକୋପ ବୃଦ୍ଧି ପାଇବାରେ ଲାଗିଛି। ଫଳରେ ଚାଷ ଜମିରେ ତଳି ପକାଇଥିବା ଅଧିକାଂଶ ସ୍ଥାନରେ ପାଣି କମି ଯାଇଥିବା ବେଳେ ଜମି ଗୁଡିକ ଶୁଷ୍କ ହୋଇ ତଳି ନଷ୍ଟ ହେବା ସହ ହଳଦିଆ ହୋଇ ମଉଳିବାରେ ଲାଗିଛି ।
ଆଗାମୀ ଦିନରେ ଏହିଭଳି ଖରାର ପ୍ରକୋପ ଲାଗି ରହିଲେ ତଳି ଗୁଡିକ ନଷ୍ଟ ହେବା ସହ ଗଜା ମରୁଡି ଦେଖାଦେବାର ଯଥେଷ୍ଟ ସମ୍ଭାବନା ରହିଛି । ଏ ନେଇ ବେଗୁନିଆ କୃଷି କାର୍ଯ୍ୟାଳୟର ମଣ୍ଡଳ କୃଷି ଅଧିକାରୀ ପ୍ରସନ୍ନ କୁମାର ପାଣିଗ୍ରାହୀ ଓ ସହକାରୀ କୃଷି ଅଧିକାରୀ ରତିକାନ୍ତ ପଟ୍ଟନାୟକଙ୍କ ସହିତ ଯୋଗାଯୋଗ କରିବାରୁ ଏ ପର୍ଯ୍ୟନ୍ତ ତଳି ଓ ଧାନ ଫସଲ ନଷ୍ଟ ହେବାର ଖବର ମିଳିପାରି ନଥିବା ବେଳେ ଆଗାମୀ ଦୁଇ ଦିନ ମଧ୍ୟରେ ବର୍ଷା ହେବାର ସମ୍ଭାବନା ରହିଛି ବୋଲି ସୂଚନା ଦେଇଥିଲେ ।
